Elaaichi wali garm chai ka pyala thaame baithi thi
Aur saath, Dheere dheere yeh shaam saj rahi thi
Yaadon ki khushboo ka ghera tha paas mein
Uth te dhuen mei Khamoshi bhi baatein kar rahi thi
mai bhi kahaan tasveer khojne baithi in parchaaiyon mein
baar baar sawaalaat bharam ke ghataa badhaa rahi thi
lekin aaj fir ek kahaani jhaank rahi thi puraani yaadon se
maazi mei lipte is khazaane se ek jugnoo ki chamak chalak rahi thi
Ho rahi thi kuch aise bayaan fir ek kavita jaise
waqt ke haathon mei pal ke koi kahaani panap rahi thi
dikh rahaa tha aks ik sitaare ka, poonam ke chaand taley
Aur apni dastaan ka urooj, uss taare ki chaannv mein, mai dhoonde jaa rahi thi...